ЯҢАЛЫКЛАР
Белгәнебезчә, 26 апрель - бөек татар шагыйре Габдулла Тукайның туган көне. Бу датаны татарлар яшәгән һәр төбәктә билгеләп үтәләр.Баландыш төп мәктәбе дә һәр ел саен бу бәйрәмне үзенчәлекле итеп уздыра. Тукай әсәрләрен сәхнәләштерү дисеңме, рәсем ясап күргәзмә оештыру, шигырь уку кичәсеме, саный китсәң бик күп алар. Быелгы чара шуның белән аерылып тора: шагыйрьнең әсәрләрен инглиз телендә яңгырату. 3 нче сыйныф укучылары Гарипова Динә һәм Заһидуллина Нурфия“Бала белән күбәләк” не инглиз телендә җырлап бирсәләр , Низамов Фидан һәм Галимов Адель“Кызыклы шәкерт” шигырен сәхнәләштереп күрсәттеләр. Тукайның әсәрләре нинди телдә булса да аһәңле яңгырыйлар икән.
21 апрель көнне Ачы авыл китапханәсе «Библионочи» в 2018 году — «Магия книги» дип исемләнгән чарада актив катнашты. Китапханәдә Г. Тукайның китапларын укыдылар. Китап укучыларны китапханәче Г.Тукайның биографиясе һәм иҗаты белән таныштырды.
Габдулла Тукай - бөек татар шагыйре, дөнья масштабына чыккан шәхес. Ул татар милләтенең символы. Без аны хәзерге заман татар әдәби теленә нигез салучы буларак та беләбез. Менә инде 100 елдан артык аның үлемсез шигърияте кеше күңелендә якты хисләр уята, яшәүнең мәгънәсе турында уйланырга мәҗбүр итә, халык һәм Ватан язмышына битараф булмаска өйрәтә. Тукай үзенең шагыйрь генә түгел, дипломат, философ, җәмәгать эшлеклесе булуын да әйтә. Шул уңайдан , Ямбулат авылы китапханәсендә "Милли азатлык күгендә ул - кояш һәм аебыз..." дип исемләнгән китап күргәзмәсе оештырылды. Китапханәче кыскача гына язучының тормыш юлы һәм иҗаты белән таныштырды, китап күргәзмәсенә күзәтү үткәрде.
Г. Тукай айлыгы кысаларында, 23 апрель көнне Тәмте - Мәтәскә гомуми белем бирү башлангыч мәктәбендә башлангыч сыйныф укучылары катнашында "Иҗат аша Тукай безнең күңелләрдә" дип исемләнгән балалар иртәсе үткәрелде. Китапханәче Шакурова Гөлия үткәргән чараның максаты балаларны Г. Тукайның тормыш юлы һәм иҗаты белән таныштыру, үлемсез шигъриятенә мәхәббәт уяту иде. Укучылар чарада бик актив катнаштылар, шигырьләрен укыдылар, җырларын җырладылар, әкиятләрен искә төшерделәр.
Китап күргәзмәсе, шигырь сөйләүчеләр конкурсы, уен-викторина оештырылды. Кичә ахырында Г.Тукай әсәрләре буенча мультфильмнар күрсәтелде.
Тукайның тормыш юлы белән таныштырылды, нәниләр өчен булган китаплары турында сөйләнелде, шигырьләре укылды. Шулай ук аның әсәрләренә нигезләнеп ясалынган мультфильмнар күрсәтелде.
Күргәзмәдә Г. Тукайның тормыш юлын һәм иҗатын чагылдырган китаплар урын алды.
26 апрель көнне район мәдәният йортының фойесында Теләче җирлекара һәм балалар китапханәсе хезмәткәрләре, район мәдәният йорты белән берлектә, татар халкының бөек шагыйре Габдулла Тукайның тууына 132 ел тулу уңаеннан «Һәр буынга яшьтәш Тукай” дип исемләнгән шигърият кичәсе үткәрде. Әлеге чарага катнашу өчен "Кояшкай", "Аленушка", "Шатлык" балалар бакчасында тәрбияләнүчеләр, Теләче урта гомуми белем мәктәбе, "Ак калфак" берләшмәсе әгъзалары чакырулы иде. Чарада үзе язган шигерын Хабибуллина Найлә һәм Г.Тукайның шигырьләрен балалар, олы яшьтәге шигырь сөючеләр укыды. Чарада шагыйрьнең тормыш юлына багышланган презентация күрсәтелде, китап, кул эшләнмәләре, рәсем күргәзмәсе куелды. Алдан игълан ителгән «Оныкларың, Тукай, бүген сине укый” исемле конкурска нәтиҗәләр ясалып, җиңүчеләр тәбрикләнде. Бәйрәм “ Туган тел” җыры белән тәмамланды.
Хөрмәтле райондашлар! Яз һәм хезмәт бәйрәме – 1 Май уңаеннан эчкерсез котлауларымны кабул итегез. Бу бәйрәм төрле буын вәкилләренең күңеленә якын, шуңа күрә аны халык бәйрәме дип санарга була. Өлкән буын өчен ул, элеккечә, хезмәт бәйрәме, ә яшьләр өчен яз, табигатьнең яңаруы, киләчәккә өмет. Бу көн һәрберебез өчен шатлык, ачышлар алып килә. Ул туган ягын яратучы һәм үзенең тырыш хезмәте белән аны матур һәм имин күрергә теләүчеләрне берләштерә. 1 Май һәр буын өчен бердәмлек көне булсын.